Xishma-le umman caalamti nukurulle geytimta saculuk sayi-tiya lab-tiyah inkoh nagaa kee maaxiyod yoh tannawna sinah duumuta.
Kataaseh kaafit yi mablo kee fartolle tillaabo.
Tillabte liggidinad Cindha-masot kanaddeeti araxah Saahot Makaadolle cadarti anaakar (ammakaakam) yekkeyaako, agiira kin cindha-maso sayi-tiya lab-tiyah gaba yessegelliinih mangum basak-yarhxe anaakar nuble.
Ta tekke ciyyod, cijaajinnat nukurko inni macalso axaye gedda, basolle amaa caashir kab-ishshe sacul mangum cawwatoyshita! Umman ged dhic leti el yamballawo ciloh, afadde caashir geyeh amaa dhic el yaybulluwe cara farhamhi sabbatah, amaa cara kee amaa caashir fakte sacul, fertoh cindha-masot maktab mangum cawwatoyshita.
Kataaseh ta gina le ammakaakam ni cijaajinna kee ni cijaajeenit taynabo dhicta ciyyo kinamhi sabbatah, yanabo kee gedko gedille meceetih xiyaa hiriiga araxah kattattawo liyo cag naba kinni.
Ta gina le ciyyohi nafaaca mangum kinni hanik, inki nukurko barhisheh ed waanisho farhe xaaja liyo. Amaa tiyä lel: “Ni dooda kee cadar inki tacriifahi lamma gaza kinon” narhxe ged rummaako marheerha! Tah akah arhxem lel, cadarah mango macna kee makko le dooda kinamhi sabbatah kinni.
Fertoh ta kaafa ed nane waqhti, cijaajinna mango araxah doodat nabned, uguugusud, duhsusud rummah mangum naba afto abah adde geytimta waqhte kinni. Amaa ged ni margadisheenit amaa gina le dhibrho kee hida le ciyyo noh baahoona yekkemko, caazaako agiira kin cadaareenit yaalloona alle tane!
Aki doodah fanalle nable agiira kin margadisheenit, goleenat caazaako agiira kin cadaareenit, agiira kin afeena-abeenit kee muziqqat dhiiceenit le mara kinon. Amaa ged ta kaado erhedhdheh taneh iggid cadarti ammakaakam kee macalso, tamaa agana akah xusak sugeekah: “Nifille tamiite ni cijaajeenitih xayla yakko kinni” yarhxin cag liyo. Amayeko ugutak lel, ta gina le ciyyo katattayteh tenebemko, naba afto lem macalsooko beyem kinni.
Mangum yicmire dokkan tublemko, xangalad kok tamiitem, caazad naba makhzan yemmeegeya lem kinni. Ni cijaajinna yakkeedo, caazadde naba makhzan gura kee mizgal liishiimah xalishaya ak yinniyemko, nifille kiyah leddelle miyam shakke male!
Abayshimalle doodalle fara farto eellemko le, fertoh cadaareenit caazaako nifille yamiite ni cijaajeenit aydukumusnemko, naba cara gufno kino! Umman ged xussuuma martah, xiyaa ayboohose wayta ciyyo yakkeedo nablo kino!
Cijaajinna sittiyahi xato kee sittiyahi aydukumusnanah kinni tanabem!
Atin yakkeedo sinni mablo kee macalso oobisha gerille oobishanta.
Gaab yoh isho!
Sin sacal
Maxammad Cusmaan