Yoh sayte ahdeeko, atu ay ak abte
Yoh abte dhiiwa, aaginah biyayshitte
Yi ciddeh tedee, gaba yok ilacte
Oddooniya incibe, yi rooxi ciddite
Akah ardi martem, kaafa yoh iffoyte
Gaab-towwa kol tine, ay tekkeh afitte
Umam koh mafarha yok maxsarin,
Ni kaxani laakin ku gabah yimirrite
Iski dagum dagum, takaleh aye geyte
Rummah taginah bas, dibolle yi xabte
Itre cado lellec, baarho yol tekke dite
Oddooniya incibe, xiyaw inkoh cur yod te
Mangom xankabite, xangal yok dhaggite
Icbideh anniyemko, kaafa inne shakkite
Aytih aabbi maram, kaafa yoyya gufte
Sugem mayyo elledel, careh dheh emeete
Careh orobo kiyah, rooxi yok mayshiite
Ama cindhaa ni carel, fiyeena beyekkah xabte
Borsa ak tesseeceh, mathaar ak arrayte
Anu dibod cawlah, thayyaarad yok korte
Qaxani yoolih kok raace, geyto kaalih koh ferte
Yi wayto tincibeh, taajir galed gaxte
Iski iyya tuble, kabbaaniyekkah sooltam
Wayto kee geyto, Yallaako kinam biyayshittam
Gaba yok ilactah, kaxano yok beytam
Nagaad asse yok ayekkah, to baarho safartam
Maliyom taadhige hanih yoyya yi koyshittam
Akkali mananniyo, taginah yi xabtam
Waytoh koyya wayem kinni, afcaado yok biyaktam
Koh farhak ine maka, ummanim yoh geyto
Waqhti yol yoomeh, yok tisriyeh kiyah marto
Atu marhiicito, dagom yi xatto
Rooxi koh maabinna, cilaagih taacato
Kaddih ku qixiniyo, dhictemko yoh gaxto
Ku hin oddooniyal, miilaalaa rufto.
Cadaareena
Cumar Axmad
Kanaadaako
Camra basak ak yod terhxe addaddiino le kalima ‘waytoh koyya wayem kinni yi laxsussam’ ❤️ addaddino le kalima meceetinah el tetneefece.
Cadar kok yisissikem yekkeh yoh tunbulluwe. Ta katayta inki shathri:
Mangum xankabite xangal yok dhaggite
Icbideh anniyemko kaafa inne shakkite.
Xangal kok dhaggitem tee dhegemko ticbidem mudhdhug kiyah shakke maki.
Amayko beexinamah aki abtam mangitoki aydukum, shaggaath xabiibi.