NINNI ADDA NABLEEDO?
Maabakooko yane gaddadde labcad adde ossiima ged…
Akkinnan xaaja gabbabbactemko, tamaa meceetih dhiica tinemko aganalle taymaaceh kinni, amayeko ziyaada ossam. Labcad tamaa lito dhic koolih yaneya meceetih yaynabe. Ishi dooro kee gadma litoyya aarhige waytemko, awlal tadiyem kee aye abtam taarhago mirhicta. Gabad lito khayreeko lel zabactah dhinta!
Ta ed nane waqhti caalam inki xirholle adde akatti tane waqhte kinni; basoh tineh akah amnabarri tine ciyyo acussubi kee ammakaakam fadhdha saacad, amaa waqhte kee amaa xiyaalih tammaakamo tantemko, amaa digir kee caashirko tewceh tanem taarhago kol tane.
Maqhrixil yakko, madrasal, hido aki mango caynah aglet martodde ku farhshishsha xaajad, kaafa asporti, farhe caynah bicishra kee cijaajinnah iggid xaaja xiyaw urhurh araxah caalamlih taysharhaarhago kee ishi nabinta umman ginah taynabo naba caashir axayi tane waqhte kinni.
Atu awla tanito?
Wuli dooda, wuli wakale, wuli xawaz, bukaako umman xiyawti thabiicat ishi dooro kee dhic leya. Tayim lel meceetih el tetneefecemko kaafit ku aniina, dooda kee aki wakali migac yaynabo dhiica.
Amayimko inki asportiiti sabbatah beyna ged: Masalan inki asportiiti digireeni ishi xawalah baaha nasri kaa kee kaa wakale busa makiiki, caalamti darajah naba xaaja baaho dhiicam kee naba siile yaxayem mudhdhug kinni. Ni dooda el marta wakale kee ummanimih taxeesebe ged, asportiiti sabbatah bukaako, fertoh lel arda kee ibi-qocsodde abbirheeko naba dhagso le dooda takkeh yoh tambulluwe.
Tayelle lel rummah meceetih el natneefeceedo, mango agiira ifaare dhadhdhem shakke male. Atin aa ginah tabliinim sarrah mablot caralle sin ilaalo kiyo. Dooda thabiicaako leya dhagso tayrhirhigeh amaye abittolle taybiddilem, umman cawdih dhicle mudarrisiin kinni. Ta dooro yubliinih mango xawal ed yakkeedo mango cindha-maso ta gina le asportiiti gabolle mece raja kee dhicleyya tanem inti cummusseh gantah tablo dhicta yane kinni.
Amaa ged: “Dhic le mariile xarkakitaado, amaye akah takke arax yaarhige mari lel sinni malah (technique)-ih abeenih abittod assaado, aa gina le cindha-maso afriye dhadhdhe?” tarhxeh taxeesebe ged, cado gaxso le essero takkeh koh sugta. Tayko basolle doodalle mango misaal takke cindha-maso sinne kee sinni dikih migac taynabeh misaal takko dhictayyaako yakkeedo mango mari yanin.
Amaydo: “Ninni adda nableedo mango agiira sinne kee sinne dikih migac xunsussaya aabuke dhadhdhemih nolle iggida” yarhxe marak, sinni mablo iyfiddiin-ishsheenih noolih gaba essegellaanta.
Gaab yoh isho,
Maxammad Cusmaan
Gaab noh isho Maxammad Cusmaan umman gedda noh dhugugulus.
Cadha micitin
Gaab noh isho, maxammad cusmaan,
Mece dhibrho le kataaba kee farto lito, taginale mablo kee asuusa noh dhuguugulus kok arhxe, ishi dhic kee ishi xaraka nok maymacallin,
Anu yi mablo, cindha maso waqhti baahe araxah dikko, madrasa kee kasko xayitekkah yewciinim hi sabbatah, kaado cusub caalamal cusub Marti (new life) erhedhishen ged, tamaa sinni dhic hido lel ayed yushtuqhuliinih nasre baahoona dhiicaanam ak yengeegelleh yaneh yakkeh yod yasobbe, mango cindha maso lel geyshisheenitti araxal (media) ay abaanam kee ay yadrasoona dhiicaanam media ko meceetih yifhimiinih miyanin arhxe.
Gaab yoh isho Axmad Daynixine
Yo rummah tam kito habibi