Iski dagum axaasabo cindhaaneetimko
Tashshem migeyinniyo el enebe baarhooko
Tillaabishem axeesebe cindhaaneeko
Tashshem tane akkalii xayte saana kee xisaabko
El unkhuluqhih xabe baarho yi sanishshe
Abinnanim el toome nabsi yaabishe
Basak-ya waqhte cindhaaned tillaabishe
Waqhti tillaabeena makkaliyo, male koh ishe
Zibo yok maabin xutukti fanko yoh ifish cadeela
Isham migeyinniyo zaban baahe barhsa
Ku balih umman baarho iyyi iffoosa
Salaamta yoh guddus table ged ni naxsa
Elle oobokeh xabem yol tekke thacasa
“Manda al gaxo liyo?” arhxih elle anel waqhte loolasa
Elle ooboke baarho yod miwagiita kaxsa
Elle oobokih iba alle uyquce daga
Xagaa sugumuh xan kee subax gadah
Yacanak ni baarho qalbeeko yi saanishsha umman gedda
Basak-ta andhaarha qooxayti duduuba
Badko dhaga walwal kee basak-ta hawa
Dhaacita dhiiceena erhxih yi dikil yi edebba
Maciisha takke hawa le, yi abbahi qooxayti
Umman ged axeesebe dhiimo taskeele yi lamma inti
Yalla xamdishita al dhiina binaadamti
Arhxem xaqqe miyakkale sorhati
Ablekkah miyaarhige ummanti
Yi abbahi qooxayti badti waacina
Badko walwal dhagah basak-ya dhamxina
Caddi-Qayyixko dhamxinal ak obta makiina
Silansilih higgid koomamad kulux-ay waacina
Yi abbahi qooxayti aaginah yane, kela agina?
Andharh koomam waacina waacinah bad balih fidina
Tillabte basak-ta cindhiina
Gaxinnexem takke cindhaane yacana!
Basak-ta ni baarho ummanti ku kixina
Qooxaytooko dhamxinal oba
Dhiicot ablih koomam kee duduuba
Xadish cilbo kee dhaafi
Basak-ay yine tomaaxi, saana yekke kaafi
Xadish Gaxta-laye kee Gindaca
Basak-ta xiyaa kee baarhoh migaca
Taginalem xabtah dulayyol sigtam naba waqhaaqhaca
Waqhte loolaasa daqhiiqha kee lelleeca
“Yi dik yi edebba” arhxih inni Yalla dhaaca
Dulayyi qusma kambih yi dhiica
Gindac Imbaatkalla, Caali Lamma gade
Xagaa sugumuh andharh ximboobadde
Leemun banaana zeytuun dhagegidde
Yoh yakkeedo tittiyah sin migoc xuse dhaarhe
Akkinnexem tekkih ta siile yoh miyabbirhe
Ta siileh sin gufto salaamta hawat goomadhdhe
Qalbi sukun xine sinko erheerhe
Cindhaanet waqhti qalbe yok yibbirhe
Inkoh axeesebe soxoba, Xammiye, Sicid kee Xammad Bilaatta
Faathna Leelish, Xanan kee Muna Maxazuta
Ta siileh sin gufto yi afcaadoh salaamta
Caala Gadeen inkoh yoh guddusanta
Cindhaaned ki tine yi ibahi maacato
Deqqe-maxaare xabah fanad saganayti
Amuula tawlal tillaaba niine alle amiiti
Basak-ta cindha katama yaarhige ummanti
Basak-ta katama yi abbah Caddi-Qayyixi
Xiyaw kee xiyaawinna, xugatti xugattoolihi
Ishlamto kishtantoh, basak-ta xuggaane xishmaalihi
Cindhaned basak-ay yine to maaxi
Basak-ya godenan Milan kee Maqhadiisho
Abinnanim kol toome nabse yaabisho (2)
Caddi-Qayyix Igiila kee kaskase
Askoolanti kiinuk axeesebe fasle
Basak-ta cindhaane to waqhte tillaase
Yacana to waqhti tillaabinnannim qalbi loolaase
Sancafe Mansuura Follaxat Daga kee Thiisha
Tillabte cindhaane mangum yi saanishsha
Muluu male takke, ta oddooniyah yaabisha
(Cadaareena)
Cadaareena
SAALIX AXMAD
Sucuudiyaako
Awwalan as wa wb istaz Wallaahi atu abaa tanem dagum maki. Ni ummat dooba balih xaf-isho abtam shuqle mangum mangum ku ashkure.
Carha micitok dhuguugulus.
Koolih nanek abshir.
Aaginah taniini xishmale yi cado sacul, “Ishim hinti migac male, migac hinti lel loyyim male” akah yarhxiiniikah ta ninnim abinno kee nim ta ginale cara maadisho bar kee lellec tandufule ni saculuk mangum gaab noh isho.
Kataaseh owwa farhem tah ayyamadde Saahot Makaado (SM.TV) ti araxah ustaaz AXMAD Cali Shuum Asmaraako abe garaa ustaaz Axmadsacad lel Saahot Makaadot araxah kab-ishaa yane garaa rummah basak-tam kinni.
Amayedde inkoh waanisho erhxeh akkekkah amaa bukaako amaa wagrohi magarod kinni waanisho farhem.
Amaa magaro lel MARGADISHEENA Axmad Cali Shuum rummah tamandhuce magaro akah yoxoyeh yane.
“MANGO KITOB XARARAa YANE” tarhxe magaro kinni.
Ta magaro tillaabe waqhte kee kado yane waqhte inkoh inkid tesgelleh noh tashrixe (caddosa) magaro kinni.
MASALAN, tillaabe waqhte gaxnemko, mangole ni abnobti aben taarikh kee dalti yine hanih, ishe taktubem kee ishe taxfizem mageytimomhi sabattah tillaabe mari lel inkim abinnaxam balih, raace marak lel inkim akah xabinnixinon mara balih foyyak ak racne. Amaye kinamhi sabbatah amaa magaro mangum basak yod te.
Abayshimalle arhxo farhe fartolle sin tillaasa gedda, ni abbob, awwal mari inkoh bakiten, racteh tane inkeeketta lel adii yanin. Amaa gedda umman tiyak, “Yi gaba ku gaba” neh elle dhiicinannirkelle akah dhiicinaniikah tillaabe dalta kee yane waqhte inkoh nashraxok nammakamoo.
Kaafi ni mido kinnik.