Xishmale ta saacadde abba tekkeh mango mas-uuliya tuyquceh barko abrha xisaabad ishi xawaz kee aki mango xaajah sabbatah dhiinekkah tillaabishaa tane abbak, amaan kee maaxiyodde tannawo koh duumuta. Kataaseh, ku shuqhleh salaaxa, ku xangalah raaxa, ku nabseh caafiyat, duumutak lel asot kee sariigalla koh attiminniye.
Kaafa kab-ishak aniyo mablo: “Kela ku waqhaaqhacadde dagum baalii takke, ku gondo koolih xazziilita mari yanniye ged dagum koh tasissike” yarhxiinimko kinni. Amayeh yoh tablo kiyah, cusubih koyya faysho makim koh warisho farha.
Tillaabe waqhtedde farhe ginah inki labhayti xabinnanim xabah ishe kee ishi care, amaye balih dhaye kaa ahleh akkii yine. Kaafa laakin ishi rooxe dhiice kee taane ed yakke waqhted nane maqhrix gabooko! Masalan, ku cindham kee ku cindhamhi inah xaaliyoh isheh tanito ged fanah karbax-arhxih ten marishsho abta mango xawalad tanem dited yambulluwe rumma kinni.
Yakko kiyah, kaafa amaa ginah abta gerho koyyah biyak, ku cindham kee ku cindhamhi inah yakkeedo biyak kinamhi sabbatah farhe mablo bahteh ku xawaz gaba ed yassagallo dhiica maqhrix irar/cijaj.
Inki labhaytoh daw-yarhxe maqhrix kaafa gedcat (accident) kinni. Ishi xawaz kee ishi xawazhi ina ishi barolle ifaarishe waya labhaytok kaafa gedcatadde tanito!
Kaafit waqhtedde, inki labhaytoh daw-yarhxe maqhrix, inki camiddah soole care balih kinni. Amaa inki camiddi atririnnanimko, gab-arhxinnaimko waqhteelih taano, fellaaco kee yaggadalo maraacin kinni. Inki labhayti yuyquceh beyak suge xawaz inki ged rademko ugut male. Mango xaaja kinni lel soono kinam kee zaahir kinam ak tangaagallo dhictam.
Amaa ged, umman umman ginah xawaz inkoh gaba ed yassagalle maqhrix irarto dhictam koo kee ku xawazah naba dhish kinni. Akah ifaaranaakah, ifaaraanah abaanam, tayshem, sahal kinam, ten taynabo dhictam, xiyaalih ten marishsham, kee aki ractem akah doraanam ku mas-uuliya kinoonimhi sababatahah ku geridde yanin ged fanah tayshem akah dorto kee ten fayishsho kol tane! Yakko kibah, ciyyod gaba yassagalloona kee mas-uuliya yuyquciinih sinne kee koyyah dhish akah yakkiiniikah caashir akah fakto lem lel koyya kinni.
Abayshimalle, ta agana ed waanishak suge mablohi arureh, inki xiyawti hido inki abba xiyawto kinni, taano dhiica, laxuuto dhiica, biyaakito dhiica, rabo dhiica xiyawto kinamih sababtah! Amaa gedda, xiyawto kinam ishek yeerhegeh ummanimih yaththarrafo kee ishi xawaz ishi barolle ifaarisho el tane.
Amaye balih lel kaafit xawaz inki aballe mas-uuliya xabeeenih ed yadiin waqhte makimhi sabbatah barolle akah sooloona kee waqhaaqhac eelih xazziilitoona mas-uuliya beya mara yakkoona el tane yaanamko kinni.
Macalsit:
Ta magaroh sabbatah mango maraako mango mablo geytimto dhictmhi sabbatah sinni mablo fidinih mablot caralle noh taktaboona xishmah sin essera.
Gaab yoh isho ♥️
Sin sacal
Maxammad Cusmaan