Gombole yi saculuh aydukumusnan, xishma kee fayla, sayto yi saculuh lel fawo kee xunsus yakke cindhaa kutub.
Kaafa ni sacul, ni bohorahi sabbatah wulim arhxo.
Ni cirhi akah barhsimaakah ni kas, ni xiyaawinna, ni dhic kee ummanimih ta oddooniyalle marta xiyawak sittah miggidino. Amayehi sabbatah lel tiyaako tanqusem tii askimilih lino gaafa sittah alifno lel amaa ni barhsi dooro yakke.
Tayim takkem lel amaa kinom ninneh naarhigeh sittiya galeeliyna ged busa kinni. Mango xaaja arhxo farha. Laakin inni addad inneh dhacammoyshiito kee basak yod yarhxeyya kiyah, yoyyad akah yassaabbeekah aki marah ashraxo mirhiica. Farhem tekkeh kaafa gombole, ni saculhi sabbatah wulim arhxo qalam ibbirheh ugutak ane. Arhxo farhem yoh taarhagoona kee yok tanqusem sinni naba kasah ed yoh taskamaloona xishmah sin essera.
Yi migac, ta kutuubudde, Faathuma yakko kinni. Sinni maabbo kee fawo el yoh taxayin migac lel ta tiya yakko kinni.
Kambih: “Cindha-masotti ummanim el yaxaasabo dhiica” ak arhxe cumrelle aniyo. Macnah 30 abak ane. Amaa sugeh ane cumrelle dikti nabra kee dulayyi sabbatah mango madrasa geyeh aniyo. Umman dulayyolle yane yi sacul lel yooko mangum saytiya labtiyah yadrusiinim shakke maliyo.
Xiyawti barhahi aniinalle mango caynah madrasa tane. Ummanimko aganalle abittoh mas-uuliya yayquciinimko naba xaaja matane. Ummanti akah yaneekah lel anu inni gabooko dikti mas-uuliya kee inni xadaar-hi mas-uuliya ayquceh bar lellecih curfen ak yeenim maliyo. Amaye kinamih sabbatah lel mas-uuliya ayidhdha siriyam meceetih aarhige. Labtiih idhdha kee saytiyah idhdha ekkeh mango waqhte nabra abak ineh, kado lel abak anemhi sabbatah.
Amah arhxik inemko yoyyah daguu curfen kee gor yoh yakko dulayyolle emeeteh sacal kee abba yakke mango xishma-le xalaalenta Rabbi yoh yimmireh, kaalih unsuttureyaako liik ine cuukaako abrhaako aganalle kinam ishelle yoh tabishe. Oddooniyalle lel wuliti wulimih wuliti lel wulimih dhiicam sitta xata ged kinni lel aniina tar-huweh, waqhaaqhac yasissikem.
Ta yi xalaalenta mangum kaa cawwatoysha. Rummah akah eeddamhi sabbatah kinni. Amayko uguteh umman sacol ni gomboleeko yuyquceh yane mas-uuliya axeesebe ged mangum yod yassaabbe, mangum lel akah axeesebe. Amaymim lel inkoh sacol kinomhi sabbatah ni caredde tane nabra kee mas-uuliya ummanil tanemih aaminemhi sabbatah kinni.
Anu marcishimeh ta kaafa el ane cara maado, umman marcaatim, cindha xaajako naba xaaja fanah: “Aye kok tunquse? Fadhdham xoola hinam yok erhex” yok ayih abbat idhdha, sacal idhdha yekkeh marca tillaaseh; amayko lakal tamaa el iniyo Afriqqaati dikil koona iggida takkem inkim yok aynuqhusekkah xedenid yi marisheh, kaafa lel ta el aniyo dik yi maadishe yi xalaalentah yakke canqur mageya. Amaye busa maki; ishi dik, dulayyol yanin kaa sacol kee yi dik ayqucih isheh dhiicamko inkim ak maxaba.
Tayim inkoh akah waanisham yi xiyawtih ciyyo yoh taarhagoona maki. Kayyah iggid sacol mangoyya tanem warisho farheh kinni. Ishi sacla balih sacal, ishi abba balih abba, ishi xalaalenta balih xalaalenta takkeh mas-uuliya tayquce ni cado gombole mango agiira lino. Tamarah lel mango cawat akah missila. Sinni gabooko ta kutub yable marak sinni kaxano kee agiirinna akah yoh guddusanta. Dulayyolle kaafa dhaltoyya maki mango marak ni marcishaa tanem, ummanim noh abaa tanem gombole ni sacol kinni.
Akim akah tanna ged:
- “Nok mawaytimina, yane sacol noh tika” nerhxeh addadde lino kaxano kee mece niya akah caddosno nol tane.
- Len mas-uuliya akah naarhago nol tane.
- Aki maraalih ten naymakaakamo nol matane.
- Lon mece niya kee aban abittoh uma gaba akah nafdawo nol matane.
- Ninneh dhicnamalle ten xatno kee xishma akah naxawo nol tane.
- Lon cuuka akah biyayshiitaaniikah ninneh dhicnamalle ten xatno kee mece irrih ina akah nakko nol tane.
- Akah lino kaxano kee Xishma akah caddosno nol tane.
Gabbabbaacah owwa farham, tamaa usun lon cuuki cindha tiya maki! Rummah cindha tiya maki! Ten bukalle inkim nok abekkah wuli thalume abnemko, ninni sacal, ninni abba, ninni cindham xangalad hayno nol tane. Ta agana arhxii sugem akah abnemko lakalle ummanim akah abnem balih noh yabliinim shakke maliyo.
Anu lel sik-arhxemko kiyah tenah yakke addoodim owwa marhiicam aarhigih kii yine!
Sinni mablo kee akah litin xishma mablot caralle yi uybulluwanta.
Gaab yoh isho
Faathuma sin sacla
Gaab noh isho, faathuma ni saclä!
Koyyah iggid fahaama mece sacul saytö noh yammangoona, akah teekah ummanti akah yane nabra kee marti wanna busa kinni taarhigem, amay xiyawah yaarhigiinim lel naba xato kinni, gabbaaceh ku xadarad koh yabaarako koo kee ku xalaale yalli inkidde gaab sin isho kokkowa farha, tane saclä noh tik!
Gaab noh isho
Xan saxinneh subaxaa tay
yallal ummanna gaba el dhay
taginah ninni waanih kas kee tacliimtakkem niqriyeh nastafaado nidhicshiisha rabbih xamdi akah gaxtoo
kataaseh leel sinni waqtee ko tagriceh tayidhdha basakta ciyyo abta nisacolti yallako sinak alayye wayto.
ta baska sin kitaaba qieaya labcadno kee nassaqafo ni ay dukumussa, ummangedih dhiguugul nohtako yalla dhaacinna
nok miwaytinima sina le mari giya
barakallahu fik ukhti Fatima
Lino cuukah idhdhaaget noh toxoyemih mangum ku cawwattoysha. Ishi mablo fidbeh tuktubih xiyaw gudusso dhictem ku agiirinnah ishaara kinni. Abshiri, gaab noh isho
Xishma-le Faathuma ni sacla erherhih ta ginah lito mece niya kee mece mablo tifdibeh nok terhxemih mangom ku cawwatoysha. Kataaseh arhxii tanem baska balih murhuucumta waani kinni. Anu inneh gombo kiyo, akah nane aniina kee lino cuuki xusaa sugtemko aganalle kinni. Amaye noh teerhegemih mango xeden koh liyo. Amah tarhxeh ni gondo kee ni cuuka taarhigem noh tammangoo. Aki mari aniina/xayaat ak yablin nukur lon. Amaye balih atu. Amaa ged: “Atu isheh eelih tane xiyawto mabaddaahishin” kok arhxe. Gaab noh isho.
Afti gabolle ta noh toxoye mango fayla kee xunsusuh mangum koh assuxummude. Kataasih lel xiyaw enketta maki…ku xiyawti yemcem ku walaadi kee kaa walaadihi macaani kinni. Yalli amah iggidam ni ummatalle noh yaymangoo. Anu inneh ablemko mangum waanishe dhaarhe, laakin aktabo mango bohsa liyomhi sabbatah daggooso kiyo. Ni doodadde uma caadah hido abittoh kaafit waqhtedde tanem koh abaanah amaymhi bukalle urinnixe biyaake kodde xaban. Ku yaylikkixin, amayek sarrah lel umam yaxayko umam beete takkih lamma yekette xalaalehi fanadde raacinnexe biyaake yakkih mara. Amayim lamma xalaale masxishsham, lamma gabooko tane walaadi/ahle bisa kiyah nooko yashshe mujtamac miyine bosoh. Kaafa nooko gaxtam nodde tablo erherhishshe. Kambih talle yi dhiico, ni saymari agiira kinon rummah! I am proud of our Saaho girls 👧 ♥️
Assalamu Calaykum Waraxmatullahi Wabarakatu
Mece migac le Cado Faarhuma Yalli Ku maaxishoo
Lel umman tiyah Kaa-kaa aaybi akah yambulluwe mara Yalli nok aboo!
Atu lel aydukum-erhex, mabbaahasin.
Ku irri ku lak koh yabbarhoonaa.
Kaafa Kataabah erherhishshem beera waanih ni tayshaabbo kok ilalna.
Osah lel, lamma canqhara ko owwa,
“Taskamalo” yanirke uble.
“Koomaamishsho” yaanam tayshe akkale.
Ni cirhe ak tekke lel: “Ni bisho” hido: “Ni gina” ak taado basak aye dhadhdheh
yodde iggida, mango cafuukaalih!
Ni inon lubak nok abaanah le ni carishan, amaa lubak ina lel sayto ni sacol
Xadaar gufan ged tamaa tenak Qabic abte Ni ina. Noyyak Lubok abeenim biyayshiitan. Kaxani gantah irri yamiitin lellec adooxal xaddiilimo kinam ak gar-hitan. Ten xalaali yayqhuce zimma Soyrat koomaako cilisham. Blatko aganalle fidinam sorha ta ged lee Yalli ku maaxishok aydukum. Umman tiyah aytiiko kaako noh kal.
GAAB NOH ISHSHOO
KU AFAD XAN XARHITOO!
Waanit gomfoo eellemko cafuu yoh erhex.
Masha Allah rummah mece farto good noh esho
Afti gabolle mangum ku ashkure. Katayshih caafiyat kee ku ciyodde nasre attiminniyuk, ta gina le saculte aydukumussa kutub noh gababbacto attiminniye
/Ferish
Erherhih ishi xalaalentih waaxelta teerhegeh amaymik masarrat abteh lel umman ni cuuka kee waaxelta duhteh ni xamdishittemih gaab noh isho.
Kataaseh lel xiyaw noolih leyan xaal ni xaalhi maratstsan kinamhi sabbatah ku xalaalenti koyyah aba xisham ku jazaako fertam maki.
Akah missil tiyä kitom ku kaatabako selem sabbatah.
Ni say-marak lel sutra kee xoola adde dago waqhted xishma-le sara hashitteenih xishma le araxah waanisha sin sacul kinomuh wadag rig-ishinneh ni esserekkah warishaa nane.
“Umman gabooko tane araxko tewce dago mara lel yalli ten yahdaw” arhxik, Koo kee ku xalaalenta afad ak gaxak lel inkoh sittaa lehi samara noh ziyadishoo!