Ta dalta kab akah ishak anem, anu abem gabbactaanamko, yi qalathko tadrasoona erhxeh kinni.
Yi xaalko sinah erherhisho, anu xiyawud dheh angale wayta tirir xaal le tiyä kiyo; yakko kiyah xiyawtod inki ged kab-erhxemko dheh ak barhsimo marhiica; lel inni qalbeeko kinni kab-arhxem. Amaa mangum kab-ishe xiyawti lel yol yaqhlithe makkale; yolle yiqhlithemko lel dheh aalih miwagara. Amaye lel mango le waqhte waqhaaqhac yol bahtem kinni.
Daltad sinah kelo.
Baxar-ya fasle abaase ged ni dikil baxarko aganal manannamhi sabbatah aki dik edeeh inni madrasa dhuguuguluso yol tine. Amaa ni dikko mango dhedhdhan le Daafo edeeh lel inni ahleelih cikkishiteh adrusik ine. Luqhat sorha, baarhot sorha, amaye balih xiyaw sorha hido zoobi wayto mangum yol tisriye. Ta ginah anik, yoyya balih aki dikko temeete barhäalih emeerhege. Ishe xiyawlih agle lii tine; dago waqhtih fanal lel mango zoobit geyte. Anu amaa ni fasli curfen waqhte irol yawciinih sinni waqhte sinneh akah farhaaniikah tillaasitan ged, anu ulah fasled raacak ine. Wuli max, amaa barhä yi agaagak defeyah: “Ayeh xaaxa beyshitto mitawcem?” teh yi esserte. Anu lel yi waanih yoolih waanishshemih mango xeden yodde yomoobbe. Yakko kiyah akah miwarishiyo. Ishe lel yooko radde ilalteh wayte ged, gabad liik ine qalam kee daftaar gabaako bukkus yok ishsheh, amaa thawlal oobishsheyaako gabad yi gototah irol yi teyyeeceh: “Talle tewceh ta basak-ya xaaxa hirgittam idhdhah fasled defeyto aaginah nabsi koh aba?” yok te.
Tee migac mudarris yemeete mara kee ase mara yablo, tiya tiyah migacah noh deecima ged, akah deecimah obbeh ine. Ishe laakin cusubih gaba yol farah: “Yi migac Faathuma kinni; anu ak emeetem lel…” teh isheh ak temeete dik kee madrasal aagina le dhic lem, amaye balih tee sabbatah aarhago yok fadhdham inkoh yoh warishshe. Anu lel inni ibreh inni migac kee ak emeete dik, amaye balih madrasad liyo hamme kee niiroh akko farham akah warishe. Amaa maxak sarrah ni kum-mece anabik tenebe.
Yoo kee teehi irhga, nowadde bisa miraaco. Ninni-ninni diikaalih sittiya neysherheerhege. Madrasa alfimta gedda, anu tee dik adiyeh teelih ayyamisha; ishe yakkeedo amaye balih yoolih ayyamishsha. Ni kaxani garoh cibra akkii yine; gari lel nolle ayshiinaa yinin.
Madrasadde akxine kee ankixxine yakkiinim tanem kinam inkoh taarhigin. Anu lel wuli gombi kaxanoh yi essere ged, walaa basak yod yowwa kibah, dik cindhih aniiko wuli yi ahlentah yi yiliishiinih yiniinimih sabbatah, kaa essero mikabbaatiyo. Ta ged ta yi saaxibto mangum tincibe; anu lel: “Takke akah emeeteh aniyom, inni bursaale gufayaako, inneh xedeneh inni dhaltoyyah amo xaf-isho kibah, ta gina lemih waqhte akah axaw mifarha” erhex, tayek sarrah lel, ta gina lemidde waanisho mifarham akah warishe. Ishe lel dik anu sorhah abeenih yaniinimih, geyeh ane mece caashir aylayyem basak adde marhxinna hanik, yoolih tamniccibemko amaye yolle yaaqhuciinim xabte.
Amaa gombi lel: “Yoh iyfihim!” arhxii aza akah yekke. Ishe lel yoyyah arhxii hido yoyya xedenishsho, abto alle tanemko sarralle arhxii manannamhi sabbatah, yoo kee teyyak nif kee caada abte taro taritte.
Amaa yi liishotti irolle yinemhi sabbatah, ittisaalah yoo kee teya inkoh ni geyak yine. Inki max yi mobaayil dhaa bakteyaako alfimteh tinemhi sabbatah teyalle yittisile. Amaa ged lel: “Sacal kin koyya takhsiremko, amaye balih lel dhaltoyyat amo cunuunussamko kiyah, mangum kaa kixinah tee kixin tiya leya; amaa ged atu waqhti tiya kito; tafhamo dhicta erhxeh kinni” teh, anu yoo kee teeko tillayto ak farhe wayak inemko takkanna ak terhxe.
Usuk lel anu ta gondoh bukalle liyo mablo yoyya esseramko dikik: “Sin barhä yi farhi male, amaa el tanel kaxantoole leya; kaalih lel abasseh tane” ak yerhxe. Ak mashshiitak inemko miraaciyo!
Dik lel mango digaala, amaye balih yooko ta gina lem miilaalinnoonim mango xurtaameelih yoh warishen. Amayed busa yoh ractaado nagaa. Madrasaako yi yayyaacoona kinoonim kee yi bukal sugusen imaan yoh meedam yoh warishen ged, xankabtoh abbirhekke waye. Anu lel dik taye akkeeko yoobbiinim essera ged: “Yoyya kinni; ku liishotti yol abe ged anu ta ginah akke…” tah, ak tem inkoh yoh warishshe ged, xurtaameh arhxem kee xabam sorha. Dik akah yeeniikah madrasaako yi yeyyeecen. Anu lel selimah liyuk ine bursaale, inni xangalad ginak ine inni niiro, inki gedil tufulti ak yiggirice musbaxat balih ulalak uble.
Ta yolle tekkem inkoh yi saaxibtoh sabbatah, ishe asissike waytaado, anu inni madrasad anniye dhaarhiyo. Amaa ged, teya akah able inti, tee dhaw akah aabbe ayti xarho farha daraja yol gufte.
Ishe mangole waqhte yi dhaacimte, madrasa alfimte ged yi dik yol temeete. Naba yi sacul fanad nok gaxeenih, ni wagarishoona mangum xawalen; anu laakin, sheethan kaa camali badok, tamaa tekkem intiiko intil yok beyah, tee asaamaxo taane. Marcishimeh marcal walaa akah mideecimiyo. Ishe yakkeedo xawalte akkalek mango dhaacimto xabte.
Yoyyad tabliinimko afal anu geyem yi carad gaxteenih ubula. Ayidhdha le ged: “Tee asaamaxo kiyo” arhxe; nabsi laakin yok xine. Ishe lel santi-kafna xabteh ishi baso balih yol tamiiteedo, anu gantih mangum akah saaneh inemhi sabbatah cafuu akah arhxe dhaarhe.
Maxko tiyah tee sacla yol abta ged: “‘Sin wagarishno’ yok towwa tah kinni” erhxeh mangum xedenah akah ibbirhe. Nagaad tanin sittiyah abnek lakal: “Faathuma dulayyoh tewce, koolih abte gica mangum adde tomoobbeh, bar lellec weeca kee xisaabko ferto xinteh tine: ‘Anu antabe ged akah uxuwa’ teh lel farto nol xabteh tane” arhxik, ilaalak suge wayem yi toshshoobbe.
Yoyyal toye aabbem sahal yol kii mananna. Yakko kiyah abam matane. “Malayka fiite araxal, Yalli aniinal ni garaasoo!” erhxeh dhaaco abamko beexinam tayyaacem yekkeh yod massaabomhi sabbatah, assilliinan ged inni dhaacooko tee mibarhishiyo.
Uli dhaxiine xiyaw yakattiinih yi carih gabol amiitih able ged: “Angara maki, kaafa akkinnanim maxteh tane” arhxeh wulim tanem shakkite; yakko kiyah tokkeeko yod maxto-le makkaliyo. To lellec sinah makik cangeh maduumuta. Faathuma: “Ak asallamo kiyo” teh mango cag ed abitteh tedee araxko maasallamoo.
“Yokkoli: ‘Yi eseemex’ yok te ged tee eseemexeh akkeedo! Yokkoli yol temeete ged sheethanko eneeceleh tee aseemexeedo! Yokkoli … yokkoli … yokkoli…” erhxeh mangum darracite. Yakko kiyah, kaafa: “Yokkoli” arhxem teya yoh matadabbe.
Teyalle Yalli teel raxmatoo!
“Ishi nabseeko yamlako dhiicati, oddooniya kee oddooniyal tanemko yimlikemhi idhdha kinni” yaanam tane. Amaa ged ninni nabseeko naslago nacakkanoo! Inkid marno lino nakkaleh mangum sittiyak abna. Ta oddooniyal laakin nemeete ged kiyah, nadaw lino ged Yalla kiyah tii miyaarhige. Amaye kinam neerhegeh lel gar-hite waynoo!
Yooko tudrusiinih yadhdhaarho yandhawwo, sinal yaqhlatho, alle taqhlathoona kura eelih aallinnan marak cafuu-toona sinalle amaanatisha!
Rabinnixem Yalla busa kinni! Kaadit yoyya balih darracah uluc ninnek bakno kiyah nadabbem mitane. Qabri lel cokka male!
AL MUSAAMIX KARIIM!
DALTA TUKTUBEH KAB-ISHSHEM: Xaliima Saalix
MACALSIT: Sinni mablo yok masuumutinantaaki, gerille yoh uktubanta.