Cindhaaneyti Doodat Camidda

Assalaam caleykum waraxmatullaahi wabarakaatuh,

timxishshime saculte kee sacuulak alle alle anniinanille cumre kee caafiyat sinah attiminniyuk, ta cindhaa farto yok mirhaytina” ayik kinni.

“Too fadhdhem erhex” yok teeni? Adhdhaaxek adhdhaaxanna! Gabbacteenih: “Tadhdhaaxem gee” yok taanam aarhige.

Umbah, kaafit yi farto cindhaaneytal kinni. Atin sodhdhaanam maki, lel ‘xunsus’ yakke yaanamko uguteh abam kinni. Yoo: “Cindhaaneyti doodat camidda kinni. Cindhaaneyti dooda yaskatte. Cindhaaneyti ishim xaf-isha. Cindhaaneyti ishim afal hayshiita” ayi noh sugen. Rummah cindhaaneyta hinnim inkim matakkem lel ninni intih ablii nane. Kaafa abbub yekkiinih cindhaaneyta fayishsham balih, nanu lel cindhaaned naneh beera cumre dufuwaa maxna ged cindhaaneyta fayishsholem kaafit cindhaaneyta kinni.

Umbah, taye kinam neerhegemko kaafit cindhaaneytak aye abno nol tane? Mangumko dagum ak xusok erherhih cindhaaneytak nakatto nol tane. Nekettemko fandha borsaale naatako kinni. “Erherhih akah nakatto linom aye kinni?” na ged, erherh meceerherhih, fadhdhishimtam cindhaaneytaako, isheh akah waanisha waani kinni. Kaa waani alayi talayemko taxfizem cindhaaneyta kinni. Ummanimhi bukalle ummanimhi afadde hayno eeddam ni waani kinni. Farhel kallaxneh, farhe marad nengelemih, ninni waanih akah waanishno kee akah naktabo nol tane. Kaafit casredde umanti ishimih eteritah ishim abita ged, nanu lel ninnimih eterinneh ninim abno eedda. Sodhdhaanamah makiiki lel xunsusuh arhxem kinni.

Amaye balih cindhaaneyti xaal barhsa le, umman tiyaalih kaa-kaa xaalah eelih nadaw nol tane. Wari raaxeenitille hido geyshisheenitti aruxulle, cindha masoyti afko umam yayyaaceya taabbe ged, usuk yeyeece uma waanitto, umaanih al tadabbo kol mitane. Dhicteh kaa fayish, tanteh lel  sikko doorit. Sikko isheh radde kinni. Sik-aktemko amaa yeyyeeceh yane waanitto malammit ged gabbaaco bakhte mageya. Caadal gaxeh ishe yaabbe ged, aqhlithii sugeh yanem ishek yeerhegeh hido ishek teerhegeh darracito hido darracitto kinni. Wari raaxenitko ak ku taydurusem ak beyteh ishe eyfeeded. Ummanimko cindhaaneyti waqhte liik ishi waqhte ishel xararisho al mitane. Koh akkik, waqhte liik tadraso icikkin. Kaafit casredde yudrusetiyaako beexinti geyaa yane waqhaaqac kee darrac ablii nane.

 Cindhaaneytak waqhte liik waqhte ishel maxararishin. Kaafa geyte bakhte  waqhte liik abe waytemko, ‘Yidarac’ yaanamko feerto makito. Darracitaa martamko waqhte geyteh abto dhictemko darseh xifret-e isheh tekkeh marah takkok.

Tah arhxe ged atin sodhdhaanamah maki, xunsusuh arhxem kinni. Cindhaaneyti cindhaaned abo missilam abo al tane. Cumre dufuwaa dufuwah taana maaxa ged cindhaaned tillaase waqhti kaa darracishaa kinni maram. Cindhaaneytak aydukum-edhex.

Dooda cindhaaneyta hinnim foyya

‘Abshir’ akke yi casayya

Gura kee mizgalle kulux-nowwa

Aki mari ishim xaf ak ishayya

Tenim tenlih abneh ninim xabe waynowaa

Cindhaaneytak inkidde nakattowaa

Katayta ijoh kaxano xabnowaa

Kaafitim kaafa, beeritim beera abnowaa

Ninnimil abboohose waynowaa

Sitta aydukumusa nifil nowwa

Cadu asal akke waynowaa

Amaye kee sin naga

Gaab yoh isho!

Maxammad-Amaan Suleymaan