Xishma-le ni katattaynit, tamaa geyshisheenitti aruxulle, lellec 26/10/2024h Londonulle, Saahot Afhi Maskaakadde yemweesebe canqur 1 miliyoonako bukalle yekkemhi saadifih tekke simbiloh addoodim kataabah www.makaado.com araxalle kab sinah ishno kino” nerhxeh sinah abne miimarko ugutak, amaa simbiloh addoodim, ta kataa araxah kab sinah ishno kinok, nookomeh, erherhaako abayshima fanah tiqhriinih, sinni mablol gerille (mablolti caralle) noh xabtoona mango xishmaalih sin duhsusna.

Gubaale

Saahot luqha 1980ko sarrah yisbite xuruuf akah yewceh, 1990/1991h lel macna kee makkoh madaaris akah fakkitam fanah, afti waani (oral language) bisa kii sugtem inkoh taarhigiinim kinni. Tankattabo kee tanqarraw erherhishshemko 34 iggidiya bisa le luqhaako tanqusem lel mangum kinni. Afti luqha bisa kii tinem bisa akkekkah lel, dago mari akah waanishan luqha (minority language) yakkeedo kinam lel osat waqhaaqhac kinnih, kii yine. Laakin waqhti anqiyyirii kee caashir ammangii yemeete gedda, ta kado adde nanino, 21 zabanya, alaye kee akatte adde yakkin zaban kinni.

 Liyi akah yakko dhiicam lel masalan, basoh wuli dooda aki doodaalih sahiilih sittiya geyaa miniini. Ummanti ishi yabbuxuteh maraa yine; ishim lel qath-ishah abbirhii yine. Kallaaxi lel dagii yine. Kallaaxeh lel dherhikke adii miyiniini. Kado laakin, xiyaw umbuka caalamti nukurko urhurh waqhtedde sittiya akah geyto dhicta caashir geytime. Dherhikke tendhewwe. Caalam cindha dikille timbiddile. Amaymih lel tamaa mango mari yatneefecin luqha (Language of Wider Communication [LWC]) kee cayda xiyaw sahiilih labcadde. Xiyaw sinni maxti nabra yaysaalaxoona ciloh, sinni guri gabadde abbirhi kee amaa mango marih luqha kee caydalle ambiddilik adde yambiddilin waqhtedde nemeeteh nane.

Afaadad kee maacil yakko dhiicam lel, tamaa yatneefece mari maxzal ak dagoonih, alle tekke ciyyo gantah daggoye kee deelale akko kin luqhaat kee cayda, ta kado waqhti baahe barhsime teknolojjiiti arux, caashir akah faakak yanemhi sabbatah, tayim araxah atneefecinnan mari yakattoona kee yafaadadoona caashir geytimeh yane.

Saahot Maskaakah Ciyyoh Erherh

Tayek basoh mango le gedda, Saahot Afhi Maskaaka aaginah erhedhdhemhi caddos kataaba, dhaw kee viidiyoh sinah akkii sugemhi sabbatah sabbatah, kado caazalle sin adabbo maliyo. Yakko kibah, ta agana akah xusaa sugneekah, tamaa waqhti baaheh yane caashir netneefeceh, Saahot Afhi Maskaakahi ciyyo erherhishneyaako, barhsime canqur naskatto erherhishne gedda, mango sikifta kee shaqhla lii ninem sin xunsuusekkah tillaabe mifarha. Amaye lel akkinnan luqhahi Maskaaka (Language Corpus) abto tekkemko, yunkuttube kutuub taallo kee luqha tunkuttubeh akah aqhrii sugen tiyä takko alle tanemhi sabbatah kinni. Inkoh akah taarhigiiniikah lel Saahot luqhalle tekke ciyyo, fertoh kataabat gabooko leegedda kinamhi sabbatah, ta aki mari, masalan, Igiliiz maskaakadde (British National Corpus) yemweesebeh yane canqur hi manga 100 miliyoonyaako bukalle kinam nable gedda; dhayekkeeko lel Soomaal Afhi Maskaakadde yemweesebeh canqur hi manga 7 miliyoonko bukalle kinam nable gedda, nimlih walaa agaagim male; erherhishsho gantah lel niya xiyaadde ciddam kinni.

Taye ablik erherhishne gedda, wuli ak yawcoona taanan boludde nibbirhem balih yekkeh noh yumbulluwe. Rummah lel xiyaa mashshishshah, niya xiyaadde cidda gondo kii tine. Amaye lel: “Ni gondo lee tatiyä, nanu lee, tayidhdha mango canqur Saahotya awlaako bahno kinni?” yarhxin sikiftaako kii yine. Ta gondo lel tamaa, “Ziizi, zizzaalelle boodimah yedee gedda, baskaako temmeege qafo yubleh, zizzaaleelih baska beetak cazuumadde meceetih kassoyeh yinemko, foyya kin ishi carelle gaxe gedda, niya cideyaako: ‘Ihii, yi diko uma bar koh orobo’ yerhxe” ak yarhxin gondo xiyaadde tasxeesebem kii tine.

 Laakin: “Farhi tinniyemko arax yane” akah yarhxiiniikah, niya cidekkah, ta ciyyo: ‘Inti mayyo, gulub mayyoh’ erherhishne. Waqhaaqhac yanem laakin nok maalayinna. Amaye lel, Saahot luqha dherh muddaako ankuttubii sugteh, xiyaw kataaba kee qiraa-ah tee atneefecii sugeenih yakkeedo, erherhishsho gantah sikif xiyaa ishsham akke mirhaarho.

Hido-hidoh: “Mitane” arhxinnannaako, tamaa ni mudarrisiin, Saahot Manhaj (Saho Curriculum Panel) ti araxah ta 34 iggidiyadde abaa sugen ciyyo rummah dhaytaanam kii mitine. Eretriya ishi finja geytek sarrah, dikti maarhagit kee irot maarhagit hi araxah rumman naba ciyyo kinni tekkem. Nifidde yane arax ayidhdha sirii tiya kinamah siniyo geyno ciloh lel, inkoh tamaa Saaholle yekkeh yane barhsime caynah kutuub naskatto erherhishne. Taye lel Saahot Madaaristi kitobko erherhishnak kinni.

Umman-ummanikkeeko neskettem kee noolih sugtem, masalan, Saahot Qaamuus (Vergari-Vergari) netneefeceh erherh cakana abne gedda, erherhih 30 shixtiya, sarrah lel 100 shixtiyaako aganalle yakke canqur yemweesebe. Mango niix kee niya lel noh yekke. Laakin tamaa 7 miliyoonko bukalle gufte Soomaal luqhaalih naybolooloye gedda yekkemko, kaddih nawce zaaba kee obna zoxo tanem nok maalayinna.

Kutuub goronuh lel gura kee mizgalle nemreredde. Eretriyalle tanem Saahot Afhi manhajti araxah akah ni guftaakah abne. Geyshisheenitti aruxulle lel umman mari farhinnan magaro yetneefeciinih Saahoh akah yaktubiiniikah uguugus abne. Ni deeco kabbaateenih lel gaba yessegelliinih assagallii yane marak ta saadifille: “Mangum gaab noh isho” ak arhxinuk, gaxishneh: “Unqac sinni ciyyoh fire ablii taniinim” ak narhxo farhna.

Amaa dikko ni gufe kutuub kee geyshisheenitti aruxulle kab-yerhxe kutuub adde ossiime gedda, Maskaakadde yemweesebe canqur hi manga 127,810 gufe. Taye lel nabaatih umman tiyah niya tekkeyaako, tharbazah malammit marshalle (geer) adii sugneh ninemko, mafarrit marsha orbishneh nifille satuutukne. Gaba yassagalli mari ammangii yemmengin. Xiyawah Maskaakat nafaaca kee bursaale akah caddowak caddoyte. Fertoh lel ummanti adde waqhaaqhacitah umman tiya farhshishsham, akkinnan luqha Saaholle yaydadabbiinih waqhtedde tane masxassa (information) sahiilih geyaanam kinni. Saahot Afhi Maskaakah bursaalelko wuli tiyä lel, Google Translate balih kin khidmat arux faakaanam kinamhi sabbatah, umman tiyahi soono rumma akah tekkeekah, ummanti ta ciyyodde uguto erherhishe. Ta agana xusne mangaako tillabneh lel Maskaakadde yemweesebe canqur hi manga 786,123 gufne. Maa shaa-Allah, inkoh ta gaba yessegelle marak: “Dhaafit zara noh tika!”

Saculti gabat agle anabii tenebe gedda, naba niya noh tekkeyaako, ta  2024h wuli naatuke bursaale neyyeeceh nine. Ta bursaale lel ta iggidih abayshima – Taxsaas 2024 – fanah, 1 miliyoon gufaanam kii tine. Yallih rigidille ummanti bar kee lellecih abe xawalah lel, ta caddos aktabo yi dufuffuyte gondohi saadif yakko dhiiceh, Saahot Maskaakadde ta kado fanah yemweesebeh yane canqur hi manga 1 miliyoonko bukkalle gufteh tane. Taye lel tamaa tewce bursaaleeko adooxa alsak basolle kinni. Taye dhicshiishe Rabbih xamde addabbinuk: “Ta bursaale tamattako xattimte sacul kee sacoolak, unqac xedenneh xedenteenim” sinak narhxe.

Saahot Maskaakahi Ciyyoh Simbilo

Yoo, ta saadifih kii yine lel, yakko missil anqaraarab akkii sugek sarrah, alle aban makaano tindhibbirheh, umman tiyah deeco (invitation) tekkek sarrah, lellec 26/10/2024h Londonulle carha mece simbilo tekkem. Ta simbilo, Qura-aanah noh erherhishshem, cindhamasoyta Anas Ismaaciil kii yine. Kaa sarralle lel, tayek basoh sinni cumrelle Saahot doodahi afaadadah guba-agana arhxii yinin, ni abba Seleeman Shum Abraahim, taaneenih yangaloona mirhiicinnoonimhi sabbatah, ten idhdha yekkeh ten farto kab-ishshem, xishma le Axmad Suleyman kii yine. Ten farto lel urhurhih: ‘Aydukum-erhexa” yaanam kii tine.

Toyek sarrah, kab-terhxe xagara lel, ta saadif carha yaymaacoona temeete cindhamaso kab-ishen caydat digir kee rigdo kii yine. Usun lel: xishma-le Shifa Cusmaan, xishma-le Maxammad Cumar Kurhe, xishma-le Saalix Muzay kee xishma-le Maxammad Cumar kii yinin. Ta saadifille sinni cayda yayballawna kee ta lellec bilcishoona sinni nabra xabeenih, noh yemeetiinimih inkoh gaab noh isho ak narhxe.

 Toyek sarrah, tamaa mango kutuub ak yemeeteh, Saahot luqhahi afaadadah bar kee lellecih tandufule sacul kee sacoola dikille taneya yiywikkileh xishma-le Ibraahim Maxammad Asmaraako talafuunuh amaa tekette xiyawalle farto tillaabishe. Xishma-le Ibraahim, ta ciyyo tankataataw yukhdume mara cawwatoyshitek sarrah, ta ciyyo nifille tadaw ummanti ishi dhicille ‘Gabaa gabaa-yarhxo’ amaanatishe. Amaa dikille mece max yeskettiinih sharaayithidde dhaw kee viidiyoh tanem lel, dijitaal akah yanqiyyire arax geytimo ciloh, amayim akah aban nuwaa akah dhammiimaakah ummanti ishelle tanem xattiimo yakkeedo duhsuuse.

Tamaa gufneh nanekke naqhaaso kee tamaato lem naxaggaro ciloh, doodat caddosuh kab-yerhxe waraqhut yine. Amaye lel:

1. Xishma-le Dr Jama Musse Jama: (Yi Gerho Saahot Luqha kee Caydadde ‘A Personal Journey into the Culture and Language of the Saho Community’),
2. Xishma-le Axmad Suleyman Cantura: (Uguugus kee Inkid-lino: Luqhat Urusnanah Guffutumte Bursaale kee SAMC hi Xagara ‘Awareness & Sense of Belonging: Milestones in Language Revitalisation and SLCP Plan’) kee
3. Xishma-le Axmadsacad Maxammad Cumar: (Teknolojjiiti araxah Luqhat Bukalle Tane Mablo Yasqiyyiriinim: Dooda kee Luqhahi Gabooko kee Inneh Ublem ‘Changing Language Attitude through Technology: A Sociolinguistic Perspective & Personal Observation’) yarhxe waraqhut kii yine.

Erherhih caashir akah yomxoyem, Dr Jama Musse Jama yekkeh, yookomeh Saahot afah ta farto tillaabishe:

“Xishma-le Sacul kee sacoola, xishma-le yi zoobit, inkoh say-tiya kee lab-tiyah aaginah asseeni;

Anu inni zoobaalih ekkeh, sin luqhahi Maskaakadde ashtaqhalo, xattishimo kee xabale abam, yoyyah naba caashir kinni. Rummah lel carha mece luqha litin.

Kaamana, sin dik, Eretriya, gufo caashir geyeh iniyo, rummah lel carha mece dik uble. Dikille lel sin xiyawko garo geyo caashir geyeh iniyo; taye lel yoyyah naba khibra kii tine, amaa anu adde garaye mari lel rummah cuzub mara, mece mara kii yinin.

Atin meceetih yi kabbatteenih, sinni doodaako tiya yok abteenih, sinni carwa, sinni niya kee sinni afcaado yoh fakteenimih mangum sin cawwatoyshita. Saahot ummatah, Saahot luqha kee Saahot caydah bakitinnixe kaxano liyo. Sin luqha, ni luqha, meceetih labcaado lel dhicidde liyom inkoh abo kiyo.

Tayek sarrah amiite gedda, Saaho labcaadeh sinlih waanisho dhiico kiyo, amayko tillaab-erhxeh lel Saahoh qaanisho kiyo, in shaa Allah

Gaab yoh isho!” yerhxek sarrah, Saahot Afhi Maskaakahi ciyyodde gaba hayemko taahe, Saahot xiyaw, Saahot luqha kee ten caydaako mangum yeerhegem warishe. Ta kaafa simbilishak nanino lellec hi saadif abittodde aso mango xawal abe maarah lel cawwatiyshite.

Saahot Afhi Maskaaka taatako missil bursaale tamaa xagarah yewceh yine maxko tookomeh tumuttukem duhsuusek sarrah, mango nafaacadde ak asso dhicta daraja gufteh tanem caddoyshe. Dr Jama ishi caddosudde, kaafa Saahot luqha ishi wakalehi luqhaatlih akkekkah, naba caalamti luqhaatlih ammookomii tanem osah warishe. Tahe yarhxiinim lel tamaa hida le luqhaat yubbuxuteh suge waqhti baahe teknolojjiiti aruxulle orobteh, ummanti tee yaarhago kee ummanti yatnaafaco caashir fakkitaa yanemhi sabbatah kinni.

Ta ciyyo tamaa fadhdhishima araxah, masalan, Google Translate balih kin aruxudde sayto ciloh lel, Google kee aki naba sharikaat sinni solaadi kee gaddi macal kibah, Saahot luqha dhawurhumtah tafeededemhi macal maloonimhi sabbatah, tenalle abna agliinot essero noh kabbaatimto ciloh, mango mari ta Maskaaka atneefecii yabloona alle tane. Amaymih, ummanti Maskaakadde orobeyaako, masalan, Saahot Afhi Kataabat Maymaca (Saho spelling checker) balih kin khidma yatnaafacoona missilam warishe. Xiyaw amaa kataabat maymaca yatneefecin gedda amadde yuktubin canqur maskaakalle tillaabamhi sabbatah, canqur sasanisho dhiica, wuli ginah lel amaa naba sharikaat xiyaw atneefecii yubliinimko, nanu abna agliinot assero dheh noh kabbaatoona dhiicaanam yakkeedo gaxishneh warishe.

Dr Jama, osah, ta dhaye geddadde, wulim lel ta iggidih abayshimadde Saahot luqhalle akkii tane ciyyo kee bukaako tee afaadad hi sabbatah kataa kitob ta kataa mari gaba adde yassagallin kitob kab-yarhxo kinam xunsuuse:

1. Jama Musse Jama,Axmedsacad Maxammad Cumar,  Giorgio Banti, Moreno Vergari
2. Jama Musse Jama,Axmedsacad Maxammad Cumar,  Axmad Suleman.
3. Jama Musse Jama, Saahot Maskaaka Siraaximak (Saaho Corpus in the making): waqhaaqhac kee caashir (challenges and opportunities), Ponte Invisible, Pisa, 2025.

Malammit waraqhat kab-ishshem lel xishma-le Axmad Suleyman yekkeh, kaa waraqhat hi magaro, tamaa agana akah tubliiniikah: “Uguugus–ayshadhdhag kee Inkid-lino: Luqhat Urusnanah Guffutumte Bursaale kee SAMC hi Xagara ‘Awareness & Sense of Belonging: Milestones in Language Revitalisation and SLCP Plan” tarhxe tiyä kii tine.

Xishma-le Axmad ishi caddosudde, ta Maskaakat ciyyoh sabbatah ummanti yaarhago missilam kee aaginah akkii tane ciyyodde ummanti gaba yassagallo dhiicam, xusek sarrah, akkinnan ciyyo hido mashruuc dhuguugulusnan kee aydukumusnan amaye balih, inkid-linoh yafaadado dhiicam caddoyshe.

Fertoh inkid-lino hido ta ciyyo umman tiyah lem gufta ciyyo kinam ummanti yaarhago, sorha mari yinniyemko lel akah yaarhigiiniikah abaanam, tamaa erhedhdheh tane ciyyo daweena kee andafo hinnim ishi bursaale taatako naba caashir faktam kinam caddoyshe.

Umman diikalle yane barhsime filcit tamaa tewceh tane xagarahi araxah inkidde yushtuqhukiinimko, ta ciyyo ishi bursaale taatako kee ni luqha dhawurhumteyaako, ijooko ijolle tillallabto kinam caddoyshe.

Abayshimalle kab-terhxe xagara lel, Ust.Axmadsacad Maxammad kab-ishe xagara kii tine. Amaa xagarahi magaro lel ta agana akah nubleekah, Teknolojjiiti araxah Luqhat Bukalle Tane Mablo Yasqiyyiriinim: Dooda kee Luqhahi Gabooko kee Inneh Ublem ‘Changing Language Attitude through Technology: A Sociolinguistic Perspective & Personal Observation’) tarhxe magaro kii tine. Ta magaro, fertoh tamaa maxzal dago mari yatneefece luqhahi wannunudde yambulluwe waqhaaqhac yekkeh, sinni luqhahi bukalle lon mablo (language attitude) table magaro kii tine. Ta mablo uma-tiyä hido aluuka ‘Negative’ hido lel mece-tiyä ‘Positive’ takko dhicta. “Akkinnanti ishi luqhahi bukalle uma mablo leya” narhxe gedda lel, ishi luqha dhayta, aki luqha lem Saaho male yakkale, aki luqhah hambereera, ara… Ta waqhaaqhac sugeh yannaw le tiya kinamhi sabbatah lel, Saahot luqhahi wannun, sinni luqhahi bukalle lon mablo mecaanille aaginah tanqayyaro dhictam soomamta waraqhat kii tine.

Ta waqhaaqhac Saahot luqhalle tamaa akah tankuttube xarfeeko erherhishak, bukaako luqhat bukalle tane mablo tekkeh, ta mablo kado waqhte baaheh yane teknolojjiiti aruxuh, fertoh lel cindhamasot mablo tanqayyaro dhictamah caddos yomxoye. Amaa suge mablol: “Ni luqha aki luqhalle taydadadabbo hido tatarjamo mirhicta, aki luqhaat teknolojjih gufeh yanekke gufteh mitane, ni luqha careeko beexinille geyno hido natnaafaco mirhicna, isheh akah tankuttubem Laatiin xarfe kinni; Carabih tankattabo alle tine” tarhxem kee aki sababko uguttam kinni. Ta mablo akah tanqayyaro dhicta aruxko ta kataytam misaalah tomxoyeh tine:

1. Akkinnan Xarfi xiyaw cijaajje tiya kinamhi sabbatah, diin gabooko nablo nolle mitane. Amayim lel masalan, ishlam xarfi hido kishtan xarfi miyane. Akinnan luqha farhinnan xarfeh tankattabo dhicta.
2. Teknolojjiiti aruxko, masalan:
   1. Saahot Maskaaka (Saho corpus) yayfeedediinih yatneefeciinim.
   2. Saahot Afah akkanih takke luqhat tarjama, masalan Google Translate balih kin khidma yayfeedediinim.
   3. Saahot Afhi Mackan Xarha (Saho language Treebank) yayfeedediinih yatneefeciinim
   4. Saahot Afhi Kataabat maymaca (Saho spelling checker) yayfeedediinih yatneefeciinim.
   5. Saahot Afhi obsa kee ororro (Saho grammar checker) yayfeedediinim kee yaneefeciinim; kee ara…

Ta agana xusnemko mangum tayek basoh sin gabolle daddago caddos ak axayi sugnem yekkeh, ta ‘Saahot Afhi Mackan Xarha (Saho language Treebank)’ tarhxe tiyä yekkemko, tamaa Saahot Afhi Maskaakak sarrah, amaa maskaakadde cikitteh hido amaa maskaakat kutuub (data) tetneefeceh erhedhdhe cusub tiyä kinni. Taye erherhishshem lel “Andrea Di Manno” kee “Paolo Milizia” ak yarhxin lamma Thiliyaanto, Naapoliiti Jaamicadde tayduruseya  kinon.

Sittiyadde caalamalle 259 Mackan Xarha tanniye gedda, ta khidma le luqhaat laakin 148 bisa kinni. Kushitikti luqhaatko tayek basoh ta khidma lem lel inki Beejja bisa yakke gedda, Saaho malammä akkii tane macna kinni. Taye lel rummah ni xedenishshah, ni cadafadishsham kinni.

Inkoh ta gina le afaadad waqhteelih yadiyeh, ni luqha yaxfizeh, dhawrha aruxudde saytemko,  tamaa sinni luqha guri gabadde abbirhii suge mari, sinni mablo mecaanille hido yookalle yasqayyaroona dhiican. Kaafit waqhtedde lel akkinnan luqha tanabo, tacandhaw, waqhti baahe teknolojjiiti aruxulle orobe waytemko, niiroh tee sarra liya takko dhiica.

Ta saadifille lel ni luqha galleeko migaxtam neerhegeh, tee natnaafaco, akah waanishno, akah naktabo kee akah naqharaw aydukum-narhxo sinalle amaanatisha.

Abayshimalle, Yalli nabik, ta saadifhi naba gerhenti xishma-le Dr Jama Musse Jama kii yinemhi sabbatah bisa akkekkah, ta ciyyoh maftix hido matoor (dynamo) kinamhi sabbatah kayyah cawat shahaadud kee aki muttuxuwa umman gabooko temeeteya tomxoye. Saahot Makaadoh migacalle fanti kanaddeeko yemeete dirce kee aki ta ciyyodde kayyah xato yakkeh higgidin nuwaa yakkeedo akah yomxoye. “Xiyaw cawwatoyshitinnixeti, Yalla gantah micawwatoyshita” akah yarhxiiniikah, tamaa Saahot luqhahi nabne kee afaadadah abaa suge mece ciyyoh umbuka Eretriyahi migacalle, fertoh lel Saahot doodahi migacalle mangum kaa cawwatoyshinna. Kaa migac kee taariikh lel umbaka noohi afcaadodde xussuumak maro kinni. Gaab noh isho, Dr Jama Musse Jama.

Saahot af kee sugtih kanaddehi migacalle yomxoye dirce yakkeedo, ust Axmadsacad umbuka amaa kanaddehi migacalle kabbaate. Ta saadifih lel, inkoh umman gabooko ta saadifhi simbilo sariigallah bakitto solaadi kee sinni waqhteh gaba yessegelle mara mangum cawwatoyshinna.

Ta simbilodde assa solaadi xattimtem, Saahot Makaadoh xakukko: Ameerikahi xak, Jiddat xak, kee Londonti xak; Saahot Makaadoh fanti Kanadde, amaye balih Saahot Makaadooko irolle yane marak inkoh gaab noh isho! Amaa xattiime ni saculko garo xusna gedda lel:

1. Adam Cuthban
2. Axmaddiin Cusmaan
3. Axmaddiin Geerar
4. Axmaddiin Saalix
5. Cabdalla Bashsha
6. Cabdalla Diiginna
7. Cabdalla Jaabir
8. Cadbdul-Qaadir Cabdul-Raxmaan
9. Cali Axmad Casa Cali Sokkari
10. Cumar IbraahimAxmad
11. Cumar Ibraahim
12. Cumar Ibraahim (Axmad Abba)
13. Cumar Kurhe
14. Ismaacil Maxammad Cali (Diiginna)
15. Maxammad Ramadan Cafadish
16. Maxammadsaciid Sunabara
17. Muusa Cumar Xangalle
18. Saalix Suleyman
19. Xasan Ibraahim
20. Xuseen Xajji Cabdalla

Amaye balih sayto ni sacul inkoh amaa akottalle tengeleh, xattimteya inkoh mangum ten cawwatoyshinna.

Inkoh ta sim simbilo yesqereerebe sacul kee sacoolah migacalle,

Gaab noh isho!

Sin sacal

AXMADSACAD MAXAMMAD CUMAR