CUZUBAM KEE CUSUBAM SAAHOT AFHI MASKAAKAAKO

CUSUBAM KEE CUZUBAM SAAHOT AFHI MASKAAKAAKO

Lellec 30/10/2022h macna kee makkoh Londonulle erhedhdhe Saahot Afhi Maskaakahi zacabah, kado fanah tekkeh tane ciyyohi arurelle sin tillaabishekkah, taginale ciyyo erhedhdha gedda, doodat gabooko fadhdhishimta gabat agle kee bukaako xiyaw yaalloona dhiican mablolko wulimidde waanisho kiyok, yoolih suganta.

“Dherhikke gufto fadhdhemko cilaagih aduu” yarhxe Çaynaati missili walaa inkettalle cusub tiya yakko maki. Akkinnanti nabam kee digge lem abo farhemko, afitekkeh, yedeeh yane arax kee gufeh yanekke soomaameh, niiroh gufo farhakke lel meceetih yaxiggire gedda kinni tamaa yixiggireh yane ishi maanafo gufo dhiicam.

Wuli ginah lel: “Afitto fadhdhemko tiyak aduu, dherhikke tadaw fadhdhemko lel gorlih aduu” yarhxe Afriqqaati missili yane. Ta missilih farto lel, akkinnannim abo farhati dherhikke gufo farhemko tiyak akkekkah, gorlih abo kaalle tanem xiyaa duhsuusa missila kinni. Akkinnanti tiyak yedeemko, afito dhiica kayya yakke, laakin dheh taanayaako ishi maanafo gufekkah, fanadde daw-yarhxe. Tamaa daw alle yerhxeh yanekkeeko nifille akah katattaysha xató, wakale kee aydukumusnan wayamhi sabbatah lel, erherhishem fanadde xaba. Abinnannim gorlih abemko laakin, dherhikke yadaw kee erherhishem abayshima gudduuso dhiica. “Inketti bettodde gantah carhuma” yarhxe missili yanem lel mibiyashshiitina.

Naba ciyyo, fertoh lel tayek basoh doodalle labcaadiminnixem abo farhati, walaa dooda tamficem yakko kibah, tamaa kaa xagara, fertoh lel tamaa usuk akah farhaakah ummanti lemille selo mirhiica. Tamaa ciyyohi gondo ummanti lemille walaa sele wayo kibah laakin, mangonti mecem farhenta yakkemhi sabbatah, sinni gaba yassagalliinimko caazalle migaxaana.

Tamaa erhedhdheh tane ciyyo, tayek basoh suginnixem hido, yicikkiniinih, “Mitakke” yenyaako xabeenim tekkemko, mango marah takko dhictam takkeh akah mitambulluwe; hido lel kuurhe kaloh, “Nanu abinnixinom aaginah takke?!” yarhxintiyaako ugutaanah, tamaa takke ciyyo cankoose kee inkinnah, cadimbililih tamaa aba marahi didde akke yakkin. Umman doodadde mecem farha mari yammangiinimhi sabbatah wuli gabooko, tamaa ciyyo erherhisheh yane marih bursaale kee birthaace lel wuli gabooko gaba beytamhi sabbatah laakin, tamaa ciyyo walaa dhamaxto kibah, daw-mitarhxeeki cilaagih nifille tadiye.

Bukaako laakin, tayim tamaa ciyyodde yane mari tenalle bisa takkem yakkaloona dhiican. Laakin ta andafof akkinnan naba ciyyo abo farha marahi nifidde tanem kibah, ulah mudhdhug kin mara taseedefem maki.

Amaydo, akkinnan ciyyo erherhishshan gedda, ummanti lemille sinah yakxano hido, ummanti sin katawo ilaalekkah, dhishsheenih tanin ciyyohi zan abtoona sinalle tane. Tamaa ciyyo dooda tamfice ciyyo tekkemko, hido-hidoh mecem maarhagit adde yengeliinih, gufto missil cara sinlih gudduusoona kinnik, niya cidekkah, nifille tarittoona sinalle aamanatisham farha.

Kataysheh lel, tamaa ta kutuubhi magaro kin gondolle sin adabbo kiyok, kado gantah gor yok tikanta.

Tayek basoh tekke ciyyo

Saahot Afhi Maskaakahi ciyyo, fadhdhishima anqaraarab akkii sugek sarrah, lellec  30/10/2022h macna kee makkoh Londonulle erhedhdhem toobbiinih tubliinim kinni. Amayim akko tillabteti yinniyemko,  ta dhibbashle: https://makaado.com/saahot-maskaakahi-ciyyo-macna-kee-makkoh-erhedhdhe/ katayeh yablo dhiica. YouTube araxalle yakkeedo fidinih kab-ishne gondo kii tine. Masalan:-

1. Afti af: https://youtu.be/TWk-kuyraIE?si=lb3JHR1T0XJIW0dl.
2. Malammit af: https://youtu.be/uCTFQvQGwE4?si=f243NmTOFffweM_q
3. Maddaxit Af: https://youtu.be/ldsbc-YXqyQ?si=SGJmoh7p_gjItF2P
4. Mafarrit Af: https://youtu.be/EjSlu7fzsuM?si=Uc5A9quTRqGHzMWE.

Ta ciyyo erhedhdhe gedda, tamaa tayek basoh yunkuttubeh suge kitob kee kutuubko yekette canqurko, 256,123 takkem macna kee makkoh yemweesebeh (tagged yekkeh) Maskaakadde sigeh yanem yakkeedo tayek basoh mangole gedda coddoyishnem kinni. Ta Maskaaka anabii tanabo kee niiroh Internet araxah takke akkaniihit tarjama (automatic translation), masalan, Google Translate balih kin nafaacadde akah assaakah takko lel bar kee lellecih ciyyodde akko nanem, kinni.

Taye dago cadad maki, laakin, hida le luqha taneyahi sabbatah waanishaa ninniyemko laakin, taye dagum kinni. Amaa gedda tamaa Saahot Afhi Masakaaka (Saho Language Corpus) akah erhedhdhe bursaale tamattako tekkemko, farhinnan raxeenanko canqur ossiimo alle tane. Amayehi sabbatah, cusubam naktubemko basolle, tayek basoh tunkuttubeh anniinnannim farhe xibarah Maskaakadde orobeh, nafaacadde akah asaakah abaanam afti ciyyoh beyneyaako, dik kee iroh shuqhli inkidde akah yakkeekah abne.

Kaado Aadarajalle nanino?

Ta saadifille lel ta ciyyo erherhaa tine gedda nodde yengeleyaako dik kee iroh fanadde geyshisheena yekkeh, kado fanah ishelle tanem abak yane  xishma-le ni sacal Axmad Suleyman Cantura cawwatoyshitekkeh tillaabo mifarha. Axmad Suleyman, ta ciyyohi asxadaadarti santoh faysheena (Project Management Advisor) yekkeyaako, ta ciyyo macna kee makkoh sariigalla gufto ishelle tanem abak yane tiya kinni.

 Ni luqhahi afaadadah bar kee lellecih dikille takhdume ni sacul, ni maarhagit lel ta saadifille mangum ten cawwatoysshitekkah tillaabe mifarha. Inkoh ten migoc talle waraarisho mirhiiciyomuh: “Yolle mabbarhina” arhxiyuk, xishma-le Ibraahim Maxammad kee Suleyman Maxammad afadde akko hayak: “Digge le ciyyo abaa taninyah gaab noh isho” akko arhxo farha. Tayek sarrah araxadde tane ciyyoh nooko xató farhoona kinoonimhi sabbatah, xishma-le Axmad Suleymanlih abna garaadde tena farhshishsham noh caddoysho kinnik gaba noolih tassagalloona kitin.

Tunkuttubeh ni gufekkeh tanem kee tankattabo araxadde tanem ak xabna gedda, tayek basoh Saahot luqhalle tekke ciyyooko garo ni gudduuseenimhi sabbatah, taykino, 786,123 canqurko Maskaakadde orobeh yamwaasabo dhiiceh yane. Taye rummah naba cadad kinni. Dhaye geddadde lel, Yalli yemko ta iggidi bakitekkah 1000,000 gufno naba raja lino. Taye lel tamaa ushshukuum-isheh xuseh iniyo: “Afitto fadhdhemko tiyak aduu, dherhikke tadaw fadhdhemko lel gorlih aduu” yarhxe missila balih, inki bursaale yabbirhiinih gorlih yakhdumiinimhi mawco tatiyä kinam noh caddoyta. Ta dhibbashle katayteenih lel Saahot Afhi Maskaakah Maanafo geytoona dhictan: http://www.somalicorpus.com/saho/index.php

 Dikille takko missil ciyyo kee ni gabooko yakko missil xató, amaye balih, Asamarat filci (Asmara Team) yibbirhiinih yanin ciyyohi addoodim noh yaxaw, dhaye geddadde, xishma-le Axamad Suleymaanlih abna defeenaalih sinalle gaxno kinok, gaba noolih tassagalloona malammih sinalle amaanatishna.

“Ayya ku amole!” akah yaanaakah, ummanim bukalle akko abnah, ta ciyyohi matoor (dynamo) kinti Dr. Jamac Musse Jamac kinnik, Yalli kaa cumrelle noh yasbaroo. Dr. Jamac abaa yanem, waanih bakno dhicnam maki. Anu: “Kaa jaza mecaanih tamfaddawo” erhxeh akko tillaabo farhe gedda, Dr. Muusa Cusmaan laakin, ishi gabooko: “Maale, ‘Gaab noh isho’ yaanam ak dagok, taye adde os” yerhxeyaako, tablin cadar alle cadaareh yane.

Cadar Dr Jamacalle [Ode to Dr. Jama]

SAAHO:

Dr Jaama fanah ta farto yoh beya

“Irhga mangiyo” yeh maleya yen kibriya

Tantem kee waytemih katawna taatiya

Casbe, ujra milowa, micne kaa maahiya

Toomem yazgacadhdheh, micimhi daaniya

Mirhayta ni dagum, noolih dagaagiya

Kaa ciyyo asxaaba,  migacko Ambiya

Irobba, Ameerika muluu Afriiqhiya

Ciyyodde nagbe meceh, ware ummanil leya

Abbubko raacisheh, micned aras leya

Neegas maki doolab, arhxem rumma kiyah

Noh yekke uma lellec, sakay kee kitiya

Awka kee abuusumal koh xabno wasiya

Caalam maarhagitid, garah gide ed leya

Dr Jaamac Musa, amaa marak tiya

Kaalih ni tozgooroyemik, macaani noh geya

INGILIIZIL TENDEDEBBEM:

Convey this message to Dr. Jama for me.

He has no pride, despite his vast knowledge.

He guides the weak and the poor, helping them to catch up.

He does not ask for reward or incentive,

but counts good deeds as his salary.

He is a judge of good deeds,

and skilfully handles bad things.

He does not despise our little things,

but shoulders them with us.

His work is a work of companionship,

And his name is like the name of the prophets.

He has a good personality in everything he does,

and is famous everywhere.

He inherited his goodness from his forefathers,

And is a role model for us all.

This is not irony or falsehood, but the truth.

In times of need, he became provision and equipment for us.

We will pass on a testament to his children and grandchildren.

The world owes the scholars what they deserve,

and Dr. Jama is one of them.

We cannot thank enough those who introduced him to us.

Tuktubem: Dr Muusa Cusamaan

    Dr. Muusa Cusmaanak, “Ishi cijaajinnaalih, Yalli koyya gaab noh isho” arhxiyuk, rummah Dr Jamacti sabbatah waanishneh baknam maki. Dr Jamac isheh mango ciyyoh wanna kinni hanik, nooko walaa inkim geyekkah, dahab kin ishi waqhteeko noh xaziilah, tablin makko le naba ciyyo niiroh tamiite ijoh takkeya noolih abaa yanek, kaa jaza mecaanih tamfaddawo.

 Aki ginah, kaalih ta ciyyo Soomaali Landiiko satishsha ni sacul lel yanin. Inne kee umbuka ni doodahi migacalle lel ten cawwatoyshitak, ten migoclih sin aysharhaarhago. Usun Tirsit Yetbarekh kee Xafsa Cumar kinon. Ten sabbatah lel in Shaa Allah wuli gedda sinalle gaxak raaco kiyo.

Tayek basoh abaa sugne ciyyo, Maskaakat masarrat sigishaanam kee yunkuttubeh suge kitob kee kutuub Maskaakadde sayishaanam bisa kii yine. Kadok sarrah laakin, ummanti gaba akah yassagallo dhiica araxah abneyaako, ciyyo meceetih akah mizgaaximtaakah abno kino. Amaye erherhishno ciloh lel ‘Saahot Afhi Maskaakah Maanafo’ decsiita hoor abneh nanino. Tayek basoh amaa hoorudde yengeleh ciyyo erherhisheh yane mari lel:

1. Axmad Suleyman
2. Axmadsacad Maxammad
3. Cabdulraxiim Al-amiin
4. Cabdu Muusa Cusmaan
5. Cabdulraxmaan Suleyman
6. Cumardiin Maxammad
7. Muusa Cusmaan
8. Jamaa Musse Jamac
9. Saalix Maxmuud
10. Suleyman Maxmuud
11. Tirsit Yetbaarekh
12. Xafsa Cumar kinon.

Tayek sarrah aki mari noolih yangaloona kee aki diikakalle sinni wakalih wokola yayyaacoona ni farhi kee xagarah linom kinni. Taye erherh kibah abayshima makinamhi sabbatah lel, ta kutuubudde xusinnixiyomko hido xanthif-isheh ak tillaabem mangum kinni. Gedko gedille lel, caddoslih sinalle gaxak raaco kiyok, andhaxta mixabina.

Amayendah lel inkoh mecaaniiko takkanna sinah duumutak, alle-alle nanelle nagaa kee maaxiyo noh yaxawo.

Gaab yoh isho,

Sin sacal

Axmadsacad Maxammad

London, 28/09/2023